Noris najbrži na testiranjima, Red Bul nije razočarao

2026-02-11 - 19:08

Šampion je nastavio gdje je stado prošle sezone – vozač Meklarena Lando Noris bio je najbrži na današnjim predsezonskim testiranjima u Bahreinu, uoči početka nove sezone u Formuli 1. Noris je drugog dana testiranja ostvario rezultat od 1:34,669 minuta i bio je brži od Maksa Ferstapena iz Red Bula sa 0,129 sekundi. Ferstapen je u jutarnjem dijelu testiranja bio najbrži rezultatom 1:35,44 minuta. Testiranja u Bahreinu su druga po redu, poslije testiranja u Barseloni prošlog mjeseca, na kojima ekipe i vozači imaju priliku da se prilagode uvođenju novih pravila za motore i šasije. Red Bul, koji proizvodi sopstveni motor prvi put otkako je ušao u sport 2005. godine, donekle je uspio da otkloni sumnje u svoju pogonsku jedinicu današnjim snažnim nastupom, ocijenio je Skaj. Četvorostruki svjetski šampion Ferstapen je veći dio dana bio najbrži, vozio je 136 krugova, ali je Noris ipak uspio da ga nadmaši u završnici. Treće mjesto zauzeo je vozač Ferarija Šarl Lekler sa 0,521 sekundom zaostatka, četvrti je bio Esteban Okon iz Hasa sa 0,909 sekundi zaostatka.