Tuhel razočaran: Navijači izviždali Vajta

2026-03-28 - 13:03

Desni bek Arsenala imao je burno veče - nakon ulaska sa klupe u drugom poluvremenu, postigao je gol za vođstvo Engleske u 81. minutu, ali je u sudijskoj nadoknadi skrivio penal koji je Federiko Valverde pretvorio u izjednačenje. Vajt je prvi put zaigrao za reprezentaciju još od Svjetskog prvenstva 2022. godine, a prilikom izlaska na teren i nakon pogotka dočekan je zvižducima dijela publike. Podsjetimo, napustio je reprezentaciju tokom Mundijala u Kataru iz ličnih razloga, a kasnije su se pojavile informacije o navodnom sukobu sa članom stručnog štaba Stivom Holandom, što je tadašnji selektor Garet Sautgejt negirao. Ipak, potvrđeno je da se Vajt u jednom periodu sam stavio van raspolaganja nacionalnom timu. Tuhel je istakao da takva reakcija navijača ne pomaže ekipi. „To se već dešavalo nekim igračima i razočaravajuće je. Reakcija je bila pomiješana. Djelovalo je kao savršena priča kada je dao gol, ali na kraju nije ispalo tako“, rekao je njemački stručnjak. U odbranu saigrača stao je i Hari Megvajer, koji je odigrao prvi meč za Englesku nakon godinu i po pauze. „Bio je odličan kad je ušao. Donio je energiju i zaslužio gol. Penal je prestrog - pokušao je samo da blokira šut, nije bilo loše namjere“, poručio je Megvajer.